महिला क्रिकेटरले तेस्रोमै चित्त बुझाए

काठमाडौं, उमेर समूहमा टेस्ट नखेल्ने राष्ट्रमध्ये अब्बल देखिएको नेपाली महिला क्रिकेटले सिनियर समूहमा राम्रो प्रदर्शन गर्न सकेन ।
तेस्रो अन्तर्राष्ट्रिय सहभागिता जनाउन मलेसिया गएको नेपाली महिला क्रिकेटरको सपना पूरा भएन । एसीसी महिला २०-२० क्रिकेट च्याम्पियनसिपमा नेपाल तेस्रो स्थानमा सीमित भयो ।

नेपाली महिला क्रिकेटको इतिहास धेरै लामो छैन । सन् २००७ मा मलेसियामा सम्पन्न पहिलो सहभागितामा राष्ट्रिय टोली उपविजेता बनेको थियो । उमेर समूहमा नेपाली महिला क्रिकेटरले २००८ मा थाइल्यान्डमा आफूलाई अझ उत्कृष्ट सावित गर्दै यू-१९ उपाधि जितेका थिए । मलेसियामा तेस्रो स्थानमा सीमित नेपाली टिम आइतबार स्वदेश फर्केको छ ।

आफूले खेलेका सातमध्ये पाँच खेलमा जित हात पारेको नेपाली टिम उत्कृष्ट बलिङ देखाए पनि ब्याटिङमा कमजोर देखियो । 'हाम्रो मुख्य कमजोरी ब्याटिङ रह्यो,' नेपाली टोलीकी कप्तान रितु कनौजियाले बताइन्, 'सोचेजस्तो ब्याटिङ गर्न सकेनौं । आशा गरेका खेलाडी चल्न सकेनन् ।' उनले फिल्डिङमा पनि केही कमजोरी रहेको बताइन ।

पहिलोपल्ट राष्ट्रिय टोलीको नेतृत्व सम्हालेकी रितुले नीरा राजोपाध्याय, नेरी थापा र रोशनीबाट बढी आशा राखेको बताइन् । नीराबाहेक उनले आशा गरेका दुई खेलाडी ब्याटिङमा चल्न सकेनन् । तर पूर्वकप्तान नेरी भने बलिङमा चम्किन र प्रतियोगिताको उत्कृष्ट बलर बनिन् । लगातार चार खेलमा जित हात पारे पनि समूह चरणको अन्तिम खेलमा थाइल्यान्डसँग स्तरअनुरूप नेपालले बलिङ र ब्याटिङ गर्न सकेन । 'थाइल्यान्डमा हामी आफ्नै गल्तीले हारेका थियौं,' कप्तान रितुले भनिन्, 'त्यसमा फिल्डिङ पक्ष निकै कमजोर भयो ।' प्रशिक्षक प्रदीपराज पाण्डेले पनि ब्याटिङ र फिल्डिङ पक्ष कमजोर भएको दोहोर्‍याए । उनले हङकङ र थाइल्यान्डको स्तर माथि रहेको

बताए । 'दुवै टिम हाम्रो स्तरभन्दा माथि थिए,' उनले भने, 'हाम्रो ब्याटिङ राम्रो हुन सकेन । अब हामी राम्रो तयारीमा जुट्नुपर्छ ।'

नेपाली प्रारम्भिक ब्याट्सवुमन नीरा र माया रावतबाहेक अन्यले उल्लेख्य ब्याटिङ प्रदर्शन गरेनन् । समूह 'ए' को पहिलो खेलमा इरानलाई ६२ रनले पराजित गरेको नेपालले दोस्रो खेलमा सिंगापुरलाई बल आउटमा २-१ ले हराएको थियो । पहिलो खेलमा नीराले ३९ तथा मायाले २० रन बनाएका थिए । सिंगापुरविरुद्ध रुविना क्षेत्रीले उत्कृष्ट बलिङ पेस गरिन् । अन्तिम ओभरमा उनले ह्याटि्रकसहित ५ विकेट लिएपछि खेल बराबरी हुँदै बल आउटमा पुगेको थियो ।

कतारलाई ८ विकेटले हराउँदा पनि नेपाली बलर चम्के । नेपालका रेखा रावल र सोनु खड्काले ३/३ विकेट लिएका थिए । भुटानविरुद्ध नेरीले ५ विकेट लिएपछि नेपालले ८ विकेटको जित हात पार्दै नेपालले अन्तिम चारमा स्थान पक्का गरेको थियो । अन्तिम खेलमा नेपाल थाइल्यान्डसँग २३ रनले पराजित भएपछि समूह उपविजेता बन्यो ।

सेमिफाइनल पनि नेपालको लागि सुखद बनेन । प्रतियोगितामा लगातार दोस्रो हार बेहोर्ने क्रममा नेपाल हङकङसँग सात विकेटको पराजित हुँदै तेस्रो स्थानको लागि चीनसँग खेल्न बाध्य भयो । उक्त खेलमा नेरीले पुनः उत्कृष्ट बलिङ गर्दै ५ विकेट लिएपछि नेपाली टिमले ७३ रनको जित हात पार्‍यो । हङकङ फाइनलमा थाइल्यान्डलाई हराएर च्याम्पियन बन्यो ।