माओवादीले बोली फेर्‍यो’

काठमाडौं, कांग्रेस सभापति गिरिजाप्रसाद कोइरालाले शिविरमा रहेका लडाकुको संविधान निर्माणपछि मात्रै पुनःस्थापना हुने भन्ने माओवादी भनाइ सहमतिविपरीत रहेको बताएका छन् ।
कोइरालाले माओवादी अध्यक्ष प्रचण्डको चरित्र नै 'कुरा फेरिरहने' बनेको उल्लेख गर्दै शान्ति प्रक्रियाबाट विचलित हुन खोजेको आरोप पनि लगाए । 'हुन त मैले नै शान्ति प्रक्रियामा ल्याएँ, म कसरी प्रचण्डजीकै खिलाफमा बोल्ने ?' बीपी स्मृति दिवसमा नेविसंघद्वारा मंगलबार आयोजित कार्यक्रममा उनले भने, 'संविधान निर्माणपछि लडाकु पुनःस्थापना गर्ने अभिव्यक्तिले कतै प्रचण्डजी शान्ति प्रक्रियाबाट विचलित हुन खोजेका त होइनन्, आशंका उठेको छ ।'

माओवादीले पछिल्लोपटक आफ्ना लडाकुको पुनःस्थापना संविधान निर्माणपछि हुनुपर्ने धारणा राखेको छ । कोइरालाले बन्दुकको भरमा क्रान्तिले पूर्णता नपाउने भन्दै माओवादीको क्रान्ति अझै अपूर्ण रहेको बताए । 'उहाँ -प्रचण्ड) अझै अपूर्ण हुनुहुन्छ, क्रान्ति पूरा गर्न सक्नुभएको छैन,' उनले भने, 'शान्तिको मार्गले नै क्रान्तिलाई सफलतामा पुर्‍याउँछ ।'

कोइरालाले आफूसँग कुरा गर्दा मीठो गर्ने तर बाहिर गएर विरोध गर्ने प्रचण्डको चरित्र नै बनेको बताए । 'जसले मद्दत गर्न चाहन्छ, तिनै नेताको अपमान गर्ने बानी उहाँमा छ,' कोइरालाले थपे, 'प्रचण्डले यो चरित्र छाडेमा शान्ति प्रक्रिया

थालनी हुन्छ ।'

प्रचण्डले अन्तर्राष्ट्रिय जगत्, राष्ट्रिय भावना र छिमेकीको कुरा पनि बुझ्न नसकेको कोइरालाको ठहर थियो । 'बोल्दा यी सबै कुरालाई ख्याल गरेर बोल्नुपर्छ, मञ्च पाए भनेर जे पनि बोल्न हँुदैन । हुन त हाम्रा साथीहरू पनि बोल्छन्,' ठट्यौली शैलीमा कोइरालाले भने, 'हाम्रा साथीहरूलाई पनि प्रचण्डजीले सिकाउनुभयो कि के हो ?'

सम्बोधनका क्रममा कोइरालाले थप ठट्टापूर्ण अभिव्यक्ति दिए । हालै झापाको कार्यक्रममा जाँदा वाईसीएलले कालो झन्डा देखाएको जानकारी आफूले पछि मात्रै थाहा पाएको उनको भनाइ थियो । 'कालो झन्डा देखाए रे, -तर) मैले देखिनँ । योबाट मलाई केही छैन, ढुंगामुढा, जुत्ता सबै खाएको मान्छे हुँ,' कोइरालाले भने, 'कालो झन्डा देखाउँदा स्वाइन फ्लु नभएको देखाउनुहोस्, सफा गरेर देखाउनुहोस् ।'

उनले नेविसंघका विद्यार्थी नेताहरूलाई प्रचण्डजस्तो नबन्न सल्लाह पनि दिए । 'तपाईंहरू लरबर नगर्नुहोस्, नझुक्नुहोस् र प्रचण्डजस्तो पनि नबन्नुहोस्,' कोइरालाले भने, 'आज एउटा, भोलि एउटा बोल्ने नेता हुनु हँुदैन ।' कोइरालाले आफूले नेतृत्व हस्तान्तरण गर्ने निर्णय गरिसकेको जानकारी दोहोर्‍याए । 'सभापतिको उम्मेदवारमा को को उठ्नुहुन्छ ?' सँगै रहेका सुशील कोइराला र रामचन्द्र पौडेलतर्फ र्फकंदै कोइरालाले भने, 'शेरबहादुरजी पनि आउनुभएको होला भन्ठानेको थिएँ तर आउनुभएको रहेनछ । उहाँहरू -देउवा, सुशील, पौडेल) विद्यार्थीहरूबीचबाटै आउनुभएको हो, अब तपाईंहरूले ठीक पार्नुपर्छ, मैले होइन ।'

यसअघि टे्रड युनियन कांग्रेसले आयोजना गरेको कार्यक्रममा पनि कोइराला सहभागी भए । त्यहाँ उनले राज्यको पुनर्संरचना जातीय आधारमा हुन नसक्ने बताए । जातीय कुरा उठाउँदा ठूलो असर पर्ने बताउँदै कोइरालाले त्यसलाई ध्यान दिएरमात्रै संविधानको मस्यौदा बनाउनुपर्ने बताए ।

'विश्वमा दुइटा जात मात्रै छन्, धनी र गरिब,' उनले भने, 'संविधान जातका आधारमा होइन, वर्गका आधारमा हुनुपर्छ । जातजातिका आधारमा हामी लक्ष्यमा पुग्न सक्दैनौं ।' उनले बीपीको मेलमिलापको जगबाटै राष्ट्रिय सहमति, सहकार्य र एकताको राजनीति सुरु भएको पनि बताए ।

'कसैले बीपीको मेलमिलापको नीतिलाई समाप्त पारेको भन्छन्,' कोइरालाले भने, 'म त्यही जगबाट सहकार्य, सहमति र एकता उत्पन्न भएको देखिरहेको छु ।' कार्यवाहक सभापति सुशील कोइरालाले बीपीको मेलमिलापको बाटोलाई छाडेर कांग्रेस बाँच्न नसक्ने बताए ।

संसदीय दलका नेता रामचन्द्र पौडेलले माओवादी लडाकु रहेको शिविर खाली नभएसम्म संविधान लेखन कार्य सुरु नहुने बताए । 'संविधानलाई रणनीतिक चालबाजीको खेलौना बनाउने काम हुनसक्दैन,' पौडेलले भने, 'बन्दुकको आतंकको छायामा संविधान सुरक्षित हुनसक्दैन । संविधान निर्माणअघि माओवादी शिविर खाली हुनुपर्छ ।' नेताहरूभन्दा अघि धारणा राख्दै नेविसंघका नेताहरूले मुलुकमा बढदो असुरक्षा र दण्डहीनता हटाउन नसकेमा कांग्रेस सरकारमा बस्नुको औचित्य नरहने बताए ।