ख्याती हत्याका अभियुक्त जेल चलान

काठमाडौं, अपहरणपछि मारिएकी ख्याती श्रेष्ठका अभियुक्त वीरेन प्रधान र मेरिना शाक्यलाई काठमाडौं जिल्ला अदालतले पुर्पक्षका लागि थुनामा राख्न आदेश दिएको छ । न्यायाधीश भुपेन्द्रप्रसाद राईको एकल इजलासले यस्तो आदेश दिएको हो ।
दुवै अभियुक्तविरुद्ध सरकारी वकिलको कार्यालय काठमाडौंले अपहरण, शरीर बन्धक र हत्या अभियोग लगाएर मुद्दा दायर गरेको थियो । दुवैलाई मुलुकी ऐन कर्तव्य ज्यानसम्बन्धी महलको १३ -१) अनुसार सर्वस्वसहित जन्मकैदको माग गरिएको छ । यस्तै अपहरण तथा शरीर बन्धक अभियोगमा मुलुकी ऐन अपहरण तथा शरीर बन्धक महलको १ र २ को कसुरमा हदैसम्मको सजाय र क्षतिपूर्तिको माग गरिएको छ । ख्यातीकी आमा राधा श्रेष्ठले दुवैका विरुद्ध प्रहरीमा किटानी जाहेरी दिएकी थिइन् ।

प्रहरीले प्रधानमाथि हातपात हुने डरले त्यस क्षेत्रको सुरक्षा व्यवस्था कडा पारेको थियो । सुरक्षाको कारण देखाएर प्रहरीले सञ्चारकर्मी र पीडित पक्षका व्यक्तिलाई इजलास भएको स्थानमा प्रवेश गर्न दिएन ।

मुद्दा दायर गराउन अघिल्लोपटक अदालतमा उपस्थित गराउँदा आक्रोशित भीडले अभियुक्त प्रधानमाथि हातपात गरेपछि प्रहरीले त्यस क्षेत्रको सुरक्षा व्यवस्था कडा पारेको हो । प्रधान र शाक्यलाई बिहान ९ बजे अदालत उपस्थित गराएको थियो । दिउँसो ४ बजे मात्र उनीहरूलाई अदालत परिसरबाट प्रहरी भ्यानमा हालेर बाहिर निकालिएको थियो । शाक्यको अनुहार कालो कपडाले छोपिएको थियो भने प्रधानले टोपीले अनुहार छेक्न खोजेका थिए । अभियुक्तद्वयलाई अदालतबाट केन्द्रीय कारागार सुनधारा जेल लगिएको छ ।