ज्याक्सनको कपाल हीरा बनाइने

विश्वप्रसिद्ध पपकिङ माइकल ज्याक्सनको निधन भए तापनि उनका प्रशंसकले उनलाई हरेक ठाउँमा हेने चाहना राख्न थालेका छन्।

यसैलाई मध्यनजर गरी सिकागोको एक कम्पनीले ज्याक्सनको कपाललाई हीरा बनाउने भएको छ। लाइफजेम कम्पनीले ज्याक्सनको कपालको एक झुप्पाबाट आधा क्यारेटको १० वटा हीरा बनाउने योजना बनाएको एजेन्सीले जनाएको छ।

माइकलको सो कपाल सन् १९८४ मा एक विज्ञापनको सुटिङका दौरान जलेको थियो। कम्पनीले हीरालाई निजी तरिकाले बेच्ने भएको छ। जसमा एउटा हीराचाहिँ माइकलका तीन सन्तानलाई निःशुल्क दिइने भएको छ। माइकलका सन्तानलाई हीरा दिन पाउँदा आफूहरू आभारी हुने कम्पनीका अधिकृतले जनाएका छन्।

कम्पनीका अधिकृतका अनुसार कपाललाई ४ हजार ५ सय ड्रि्री तापमा राखेपछि कार्बनमा बदलिनेछ। त्यसपछि यसलाई क्रिस्टलीकरण गरी हीराको रूप दिन सम्भव हुन्छ। यो प्रकृया अपनाउन करिब ६ देखि ९ महिनासम्म लाग्नेछ, जुन प्राकृतिक प्रक्रियाभन्दा धेरै छोटो अवधि हुने समाचारमा उल्लेख छ।